6.8 C
Skopje
Friday, February 3, 2023

Përplasen PD dhe LSI: Bardhi tregon pse dështoi koalicioni. Kryemadhi: Mashtrim, i shërben Ramës

Sekretari i Përgjithshëm i PD-së, Gazment Bardhi zbuloi në emisionin Open arsyen e konfliktit të krijuar mes PD-së dhe LSI-së.

Ai theksoi se PD i ofroi 15 mandate të sigurta LSI-së, por kjo e fundit tha se 34 i siguronin të vetëm. Sipas Bardhit, LSI donte të garonte në zgjedhjet e 25 prillit në listë të vetme.

“Gjatë zgjedhjeve ka pasur një mungesë totale vullneti nga LSI për të bashkëpunuar me ne, debati i famshëm për të hyrë në listë të veçantë apo bashkë. PD i ka ofruar 15 mandate, qëndrimi ishte që sipas sondazheve do fitonin 34 mandate në të gjithë territorin e Shqipërisë. Kam pasur një bisedë në zyrën e kryetarit të partisë. Na thanë do i fitojmë vetë dhe nuk do hyjmë bashkë në lista. Dy muaj pasi isha caktuar drejtues politik i qarkut të Elbasanit konkludova se LSI nuk merrte asnjë mandat në Elbasan”.

Petrit Vasili ka kërkuar të ketë një lidhje direkte me studion e “Open”, për të dhënë versionin e tij për koalicionin PD-LSI në zgjedhjet parlamentare të 25 prillit.

“Nuk ka pasur kurrë diskutime për numra apo premtime mandatesh. Ka pasur vetëm një angazhim që do të kishim takime të përbashkëta gjatë fushatës elektorale, gjë që nuk ndodhi asnjëherë se mungesa e vullnetit nga PD ishte e dukshme. Diskutim për 15 mandate apo gjëra të tilla nuk ka pasur. Kemi diskutuar vetëm cila është strategjia për maksimizimin e votës”.

Ndërsa kryetarja e LSI Monika Kryemadhi reagoi në facebook:

“Një pyetje për të gjithë anëtarët e kryesisë së PD: Kur është mbledhur kryesia e PD për t’i propozuar LSI listën e përbashkët? Në cilën ditë dhe orë? Listës së mashtrimit, që për djegien e mandateve do t’i dilte në krah kancelarja Merkel dhe PPE, iu shtua tashmë publikisht edhe kjo e 15 mandateve të ofruara. Një mashtrim pervers që kalon çdo limit njerëzor dhe që i shërben vetëm Ramës dhe hijes së tij”./tch

Latest news
Related news