Ditën e sotme në teatrin “Faruk Begolli” është mbajtur një mbledhje komemorative nga Kolegji AAB për nder të jetës dhe veprës së regjisores Burbuqe Berisha, e cila ndërroi jetë mesditën e djeshme.
Krahas kolegëve të shumtë që e kujtuan të ndjerën, me shumë emocion e me fjalë prekëse foli edhe motra e saj, Trëndelina Berisha.
Ajo tha se Burbuqja kohëve të fundit i frikësohej shkallëve të Ministrisë së Kulturës, për shkak të problemeve shëndetësore, dializës të cilën e bënte tri herë në javë.
Foto: Facebook
“Nuk mund ta përshkruaj kontributin e madh ndaj familjes. Kemi mbetur shumë të ri pa prind dhe ajo ka qenë përkrahja jonë kryesore. Na ka mbështetur, është kujdesur për neve, nuk po mund ta paramendoj që nuk është më. Nuk e kemi një përkrahëse të fortë si ajo. Jam e lumtur që e kisha motër dhe ndihem shumë krenare për ato që ka bërë për neve si familje dhe vendin tonë. Dua të falënderoj të gjithë ata që i kanë qëndruar pranë nga momenti që ajo ka rënë në dializë dhe momentet e para duke e ditur natyrën e Buqës, në asnjë moment nuk është dorëzuar”.
“Nuk është ndalur në asnjë moment, ka qenë shumë e papritur për ne, ka punuar më shumë se unë, më gjatë se unë edhe pse tri herë në javë shkonte në dializë. E ka cekur që atyre shkallëve të Ministrisë iu ka frikësuar, para dy javëve kemi diskutuar dhe unë nuk e mora shumë seriozisht se mirë ka qenë, tha e kam një shtrëngim, po kam frikë atyre shkallëve po mbes aty. Pasi që gjithmonë ka qenë nën kontroll të mjekëve. I thash hajt se edhe kjo tejkalohet. Dje kam hyrë në shkallë e kam parë, në shkallë të Ministrisë, thash eh kjo e paska ditur ku do ta ketë fundin, atyre shkallëve iu frikësua dhe mbeti në ato shkallë”, kanë qenë fjalët e të motrës.
Foto: Facebook
Theksojmë që regjisorja do të varroset sot në orën 15:00 në varrezat e qytetit në Prishtinë.
